Ciyaar kubadda cagta ah oo dhexmari lahayd labo koox oo ka kala dhisan Sacuudiga iyo Iran kana tirsan tartanka Champions League ee qaaradda Asia ayaa la joojiyay, ka dib markii albaabka garoonka laga soo galo la dhigay taallo lagu sawiray Jeneraalkii Maraykanka dilay ee Qasim Suleymani ee hogaamin jiray ciidamada Jamhuuriga Iran.
Sawirrada lagu faafiyey baraha bulshada ayaa muujinaya taalada Suleymani oo la dhigay albaabka garoonka kubbadda cagta, goobta ay soo marayaan ciyaartoydka markii ay kasoo baxaan qolka labiska oo ay soo galayaan garoonka.
Ciyaartii Isniintii shalay la qorsheenayey inay dhexmarto kooxda Al Itixaad ee Sucuudiga iyo Sepahan ee Iran ayaa dib loo dhigay ka dib markii ay kooxda Sucuudigu diideen in ay ka baxaan qolka labiska ee garoonka Naghsh-e Jahan Stadium ee magaalada Isfahan ee dalka Iran.
