Dagaal u dhaxeeyay ciidamada federaalka Itoobiya iyo maleeshiyaad Amxaaro ah ayaa ka qarxay deegaanno dhowr ah oo katirsan ismaamulka Amxaarada, waxa uuna dagaalka saameyn ku yeeshay nolosha dadka deegaanka.
Dadka deegaanka ayaa ku waramay in dagaalka xoogiisa uu ka socdo magaalada taariikhiga ah ee Lalibela , waxaana hakad galay shaqadii garoonka magaaladaasi, waxa uu sidoo kale dagaalka saameeyay dhaq dhaqaaqii magaalada ka jiray.
Meleeshiyaadka loo yaqaan Fano ayaa guulo ka sheegtay dagaalka ay ku jiraan ciidanka dowladda , waxa ayna sheegeen hoggaanka maleeshiyaadkan in ay la wareegeen garoonka diyaaraha magaalada Lalibela iyo goobo kale oi muhiim ah.
Dagaalka u dhaxeeya maleeshiyaadka deegaanka iyo ciidamada federaalka Itoobiya ayaa sidoo kale ka socda afar magaalo kale oo katirsan gobolka Amxaarada, waxa ayna dowladda ciidamo badan u daad-gureesay goobaha ay dagaallada ka socdaan.
Afhayeen u hadlay ciidamada Itoobiya ayaa sheegay in dowladda qaadeyso tallaabooyin adag oo ka dhan ah maleeshiyaadka ka dagaallamaya gobolka Amxaarada.
