Madaxweynaha Jubbaland Axmed Maxamed Islaam (Axmed Madoobe) ayaa kulan xasaasi ah kula qaatay magaalada Muqdisho Xildhibaanada labada aqal ee ka soo jeeda degaanada Puntland.
kulanka ayaa looga hadlay sidii doorashada Madaxweynaha ee dhowaan la qabanayo looga dhalin lahaa isbedel ku yimaada dhinaca hogaanka dalka.
Waxaa kulankan dalbaday Axmed Madoobe sida ay ogaatay Allbanaadir Online.
“Waxaan maanta kulan miro dhal ah yeelanay Xildhibaanada Baarlamaanka Federaalka ah labadiisa Aqal ku matala Puntland oo aan ka wada hadalay xaalada uu dalku ku jiro iyo sidii looga dhabayn lahaa filashooyinka shacabka Soomaaliyeed ee dhismaha Dowlad Cusub oo dalka ka saarta xaaladan adag” ayuu yiri Axmed Madoobe oo qoraal soo dhigay bartiisa facebook.
Puntland iyo Jubbaland ayaa waxaa ka dhexeeya isbaheysi siyaasadeed oo ka dhan ah Villa Somalia, iyadoo labada maamul ay si weyn uga soo horjeedeen siyaasada Madaxweyne Farmaajo.
Dhinaca kale, Axmed Madoobe ayaa caawa kulan la qaatay Gudoomiyaha Aqalka Sare Mudane Cabdi Xaashi Cabdullahi oo ay ka wada hadleen xaalada dalka iyo geedi socodka doorashada Somalia.
