Cutubyo ka mid ah Ciidamada difaaca Puntland oo maanta hawlgal qorshaysan ka fuliyay buuraha Calmiskaad ayaa halkaasi ku dilay ajaanib ka tirsanaa maleeshiyaadka Daacish.
Qoraal kooban oo ka soo baxay Hawlgalka Ciribtirka Kooxaha Argagixisada ah ee Puntland ayaa lagu sheegay in Ciidamada au hawlgalkaasi ku dileen xubno ka tirsan Daacish, balse saraakiishu ma bixin wax faahfaahin ah oo ku saabsan tiradooda.
“Ciidanku waxay dileen Ajaaniib Argagixiso Daacish ka tirsan” ayaa lagu yiri qoraal kooban oo ka soo baxay Hawlgalka Ciribtirka kooxaha Argagixisada ah ee Puntland
Wararka qaar ayaa sheegaya in ciidamada Puntland la wareegeen Talisyo ay kooxda Daacish ku laheyd degaanka Bali dhidin ee gobolka Bari
Puntland ayaa dhowaan bilowday howlgal balaaran oo buuraleyda gobolka Bari looga sifeynayo kooxda Daacish oo halkaas ku leh fariisimo waaweyn, waxaana howlgalkaas cirka ka taageeraya mararka qaarkood dayuuradaha Mareykanka.
