Wasiirka Arrimaha Dibadda iyo Iskaashiga Caalamiga, Mudane Danjire Axmed Macallin Fiqi Axmed, ayaa kula dardaarmay xafiiskiisa Wasaaradda ee caasimadda magaalada Muqdisho safiirrada magacaaban iyo labo qunsul guud.
Intii kulanka qaabilaadda lagu guda-jiray, Wasiir Fiqi waxa uu safiirrada magacaaban iyo labada qunsul guud xog-waran ka siiyay howlaha ay u xilsaaranyihiin, isaga oo sheegay in ay u howlgalaan sare yeelidda danaha qaran ee Soomaaliya iyo xoojinta xiriirka caalamiga, iyadoo laga filayo in wax la taaban karo ay ku soo kordhin doonaan dadaallada diblomaasiyadeed ee dalka.
Wasiirku waxa uu u rajeeyay xubnahani magacaaban in ay ku guulaystaan, kana soo dhalaalaan waajibaadka loo igmaday, isaga oo ku dhiirrigeliyay in howlaha ay u qabtaan si wadannimo, naf-hurnimo, daacadnimo iyo hufnaan leh.
Ugu dambeyn Wasiirka Arrimaha Dibadda Soomaaliya ayaa safiirrada magacaaban u sheegay in kalsoonida uu ku qabo awooddooda in ay ku matalaan Soomaaliya ,si wax-galnimo leh oo gacan ka gaysanaysa kor u qaadidda sumcadda dalka.
Xafiiska Shabakada Allbanaadir.com
Muqdisho Somalia
Allbanaadir@live.com
