Ciidanka amniga Jubbaland ee fadhigoodu yahay degmada Dhoobley ayaa sameeyey howlgallo lagu xaqiijinayo nabad-gelyada xaafadaha kala duwan ee degmada.
Ciidanka ayaa intii howlgalku socday ku guulaystay inay fashiliyaan gacantana ku dhigaan qaraxyo ay kooxda Al-shabaab gelisay qaar ka mid ah jidadka soo gala magaalada.
Dhinaca kale, Madaxweyne ku xigeenka koowaad ee Jubbaland Mudane Maxamuud Sayid Aadan oo ay wehliyaan Taliyaha Ciidanka Daraawiishta Jubbaland ee gobolka Gedo Jeneraal Cabaas Ibraahim Gurey iyo ku xigeenkiisa Gashanle sare Ali Xasan Deer (Cali Abshir) Guddoomiyaha degmada Doolow iyo siyaasiyiin ayaa maanta kormeeray xeryaha cusub ee loogu talagalay ciidanka kala duwan ee Dowladda Jubbaland ee gobolka Gedo.
Madaxweyne ku xigeenka ayaa wuxuu bogaadiyay diyaar garowga ciidanka isagoo kula dardaarmay inay u diyaargaroobaan sugidda amniga gobolka iyo isku furka degmooyinka iyo deegaanada iyagoo kaashanaya ciidanka xoogga dalka ee ka howlgala gobolka Gedo.
