Madaxweynaha Soomaaliya Xasan Sheekh Maxamuud ayaa muddo saddex todobaad ah ku sugan magaalada Dhuusomareeb ee xarunta maamulka Galmudug, waxa uuna madaxweynaha halkaasi ka wadaan hoggaaminta howlgalka xureynta bariga Galgaduud.
Xasan Sheekh oo ah taliyaha ugu sareeya ciidanka qalabka sida ayaa wada abaabulkii ugu dambeeyay ee lagu doonayo in Al Shabaab guud ahaan laga saaro Galmudug, gaar ahaan degmooyinka Ceelbuur iyo Galhareeri oo sanno badan kooxda heestaan.
Madaxweynaha ayaa la tusay istaraatiijiyada loo dejiyay howlgalka la doonayo in Al Shabaab looga saaro degmooyinka Ceelbuur, Galhareeri iyo deegaannada hoostaga, waxaana la tusay madaxweynaha qaabka loo qorsheeyay in loo qabto degmooyinkaasi.
”Madaxweynaha oo ku howlan xaqiijinta Soomaaliya xasiloon oo ka caagan argagixisada ayaa Ciidamada Xooga Dalka u jiheeyay shaqadoodii qaran, waxaana iyagoo kaashanaya dadka Soomaaliyeed ay wajaheen cadowga, iyadoo qorshahu yahay cirib tirka Argagixisada Galmudug ku harsan in lagu soo gabagabeeyo wajiga hore ee dagaalka dalka looga xoreynayo Khawaarijta” ayaa lagu qoraal kasoo baxay Villa Soomaaliya.
Ciidanka xoogga iyo kuwa deegaanka ayaa saacadihii lasoo dhaafay Al Shabaab ka saaray deegaanno katirsan Galgaduud, waxa ayna ciidamada qorsheenayaan in maalmaha soo aadan guud ahaan la wareegaan Ceelbuur, Galhareeri iyo deegaannada hoostaga.
