Jabhada ONLF ee ka dagaalanta dhulka Soomaali Galbeed ee maamusho dowlada Itoobiya ayaa maanta ku dhawaaqday xabad joojin iskeed ah, waxa ayna Jabhadan dowlada Itoobiya dagaalo kula jirtay sanado badan.
Qoraal kasoo baxay Hogaanka Jabhada ONLF ayaa lagu sheegay in xabad joojinta ay ku dhawaaqday ay maanta dhaqan galeyso, waxa ayna Xabad joojintan salka ku heysaa baaqa Nabadeed Ra’isul Wasaaraha Itoobiya Abiy Ahmed.
Afhayeenka Jabhada ONLF C/qaadir Xasan Hirmooge (Caddaani) ayaa sheegay in xabad joojintan ay salka ku heyso baaqa nabadeed ee Hogaamiyaha Itoobiya, waxa uuna xusay in xabad joojintan ay maslaxad u tahay dadkooda.
“Baaqa nabadeed ee hogaamiyaha Itoobiya Abiy Axmed, iyo talaabooyinka ay xukuumaddu qaadday ee ay aasaaska ugu dhigayso wadahadallo nabadeed, Waxaan u aragnaa in xabbad joojintu ay dadkeenna maslaxad u tahay” Ayuu yiri Cadaani.
Dowlada Itoobiya ayaan wali ka hadlin xabad joojintan ay ku dhawaaqday Jabhada ONLF ee dagaalka kula jirtay dowlada Itoobiya, waxa ayna Xabad joojintan kusoo aadeysa xili dowlada Itoobiya dhawaan kooxdan ka saartay Liiska Argagaxisada .
