Islaan Ciise Islaan Maxamed oo ka tirsan Isimada Puntland ayaa wadahadal dheer ka dib ku guulaystay in magaalada Garoowe laga saaro ciidamo xalay soo galay oo diidanaa diiwaan gelinta doorashooyinka Puntland
Ciidamadan ayaa xalay la wareegay qayba ka mid ah magaalada, iyadoo talaabadaas ay dhalisay xiisad dagaal oo magaalada saameysay
Rasaas goos goos ah ayaa gelinkii danbe ee xalay ilaa saaka laga maqlay magaalada Garoowe gaar ahaanna nawaaxiga Jaamacadda PSU iyo dugsiga sare ee Gambool oo ka mid ah goobaha loo qorsheeyay diiwaan-gelinta.
Wararka ayaa xaqiijinaya in rasaastaas ay dhexmaraysay ciidamada diidan barnaamijka diiwaan-gelinta doorashooyinka iyo kuwa loo xilsaaray ilaalinta goobahaas ee daacada u ahaa Madaxweyne Deni
Warar kale ayaa sheegaya iney socdaan wada-hadal u dhexeeya labada dhinac oo ay gar-wadeen ka yihiin odayaasha iyo waxgaradka inkastoo aan illaa hadda la sheegin wax natiijo ah oo la gaaray.
