Dowlad goboleedka Puntland ayaa si adag uga hortimid go’aankii dhawwaan kasoo baxay wasaaradda wasaaradda Isgaarsiinta xukuumadda Soomaaliya oo ku aadanaa in dalka laga mamnuucayo isticmaalka baraha Tiktok,Telegram iyo 1Xbet.
Wasiirka Warfaafinta Puntland Maxamuud Caydiid Dirir oo maanta shir jaraa’id ku qabtay magaalada Garoowe ayaa sheegay in aysan Puntland waxba ka khusayn go’aanka kasoo baxay xukuumadda Soomaaliya ee fadhigeydu yahay Muqdisho.
Waxa uu sheegay wasiirka in shirkadaha isgaarsiinta ee ka jira Puntland aysa fulin karin go’aannada kasoo baxay xukuumadda Soomaaliya, waxa uuna cadeeyay in barahan bulshada ay sidoodii uga shaqeenayaan deegaannada Puntland.
“Kuma khasbana shirkadaha Isgaarsiinta Puntland in ay fuliyaan go’aanka xukuumadda Soomaaliya mana fulin karaan amarada Magaalada Muqdisho ka soo baxay” ayuu yiri wasiirka Warfaafinta Puntland Eng Maxamuud Caydiid Dirir.
Hadalkan kasoo yeeray maamulka Puntland ayaa imaanaya xilli xukuumadda Soomaaliya shaacisay in 24-ka bishan la xirayo baraha bulshada ee aadka u isticmaalaan dhallinta ee kala ah  Tiktok, Telegram iyo 1Xbet.
