C/raxmaan C/Shakuur oo dhaliilay qorshe uu wado Madaxweyne Xassan Shiikh

Xildhibaan Cabdiraxmaan C/Shakuur Warsame oo ka tirsan Xildhibaanada golaha shacabka Soomaaliya ayaa si aan toos aheyn u dhaliilay qorshe uu gadaal ka riixayo Madaxweynaha Somalia Xasan Shiikh oo ah dowladu ka guurto nidaamka baarlaamniga ah ee Madaxweyne iyo Raisul Wasaare, loona guuro Madaxweyne iyo Madaxweyne ku-xigeen.

Qoraal uu baraha bulshada Soo dhigay Xildhibaan Cabdiraxmaan C/Shakuur Warsame oo arintan lagu durayo ayaa sidan hoose ku bilowday.

Soomaaliya saddex nidaam Jamhuuriyadeed ayaa soo maray.

1- Tii koowaad ee dimoqoraadiga ahayd, nidaamka xukunka wuxuu ahaa Baarlamaani, waxaa afgambiyey askarta.

2-Jamhuuriyaddii labaad ee ay milateriga xukunka qabsadeen, Kacaankii Hanti-wadaaga ahaana soo rogeen, Nidaamka xukunka wuxuu ahaa mid Madaxtooyo oo Madaxweyne iyo  ku xigeen ah (Presidential), waa tii lagu kala tegey.

3- Jamhuuriyaddii Saddexaad, Soomaalidii dib u heshiisiinta isugu timid Carta, dalka Jabuuti  waxay u laabteen nidaamkii Baarlamaaniga ahaa ee Jamhuuriyadii koowaad lagu yagleelay.

Haddaba, hal mar oo nidaamka Madaxtooyada (Presidential system-ka) la qaatay dalka ayaa ku dumay.

Soomaali waxay ku maahmaadaa “Wixii umusha u roon ayaa ilmahana u roon”

- Advertisement -