Guddiga Madaxa bannaan ee Xuduudaha iyo Doorashooyinka Jubbaland ayaa kordhiyey waqtiga isdiiwaan gelinta Musharaxiinta aan weli isdiiwaan gelin sida ku xusan qoraal ka soo baxay Guddiga oo loo diray wakiilada beesha caalamka.
Waxaa lagu sheegay qoraalka in muddo saddex maalmood loo qabtay Musharaxiinta mucaaradka inay isku diiwaan geliyaan, waxaana dib loo dhigay doorashada Madaxweynaha Jubbaland oo dhici laheyd 19-ka bishan waxaana loo qabtay doorashada xili cusub oo ku beegan 22-ka bishan.
Xiliga 3da cisho ah ee loo qabtay iney isku diiwaan geliyaan Musharaxiinta ka soo horjeeda Axmed Madoobe ayaa ka bilaabaneya 17-ka bishan oo maanta ku aadan wuxuuna ku egyahay 19-ka isla bishan.
Dhinaca kale waxaa weli sidoodii u taagan shuruudihii horay Guddiga u soo saaray ee lagu xiray Musharaxiinta kuwaasoo ay ka mid yihiin ka tanaasulida xubnaha xilalka haya, xiliga degenaanshaha oo laga rabo in Musharaxa uu labo sano ka badan dalka joogo iyo in aanu Xaas Ajnabi ah qabin, waxaana shuruudahan cabasho xoogan ka keenay musharaxiinta qaar oo aan buuxin Karin.
Xafiiska Shabakada Allbanaadir.com
Muqdisho-Somalia
Allbanaadir@live.com
