Kooxo hubeysan ayaa xalay weeraray xarunta Maamulka degaanka Garasbaaley ee duleedka Magaalada Muqdisho.
Ciidanka ilaalada Xarunta degaanka Garasbaaley oo ku taalla dhabarka dambe ee Jaamacadda Shabeelle iyo ragga weerarka soo qaaday ayaa waxaa halkaasi ku dhexmaray dagaal socday muddo kooban.
Xubno ka tirsan Maamulka degaanka ayaa sheegay inay iska difaaceen raggii xarunta soo weeraray, waxaana halkaasi gaaray ciidamo gurmad ah oo ka tegay Xerada Asluubta ee magaalada Muqdisho kuwaasoo xoojiyay ciidamada ilaalada ka ah xarunta Maamulka degaanka Garasbaaley.
Ugu yaraan laba ruux ayaa la xaqiijiyey iney dhaawacmeen weerarkan, kuwaasoo ka mid ahaa ilaalada xarunta la soo weeraray sida ay sheegeen ilo xog ogaal ah.
Ciidamo ka tirsan Booliska Somalia ayaa howlgallo dad lagu soo qabtay ka sameeyay xaafadaha ku dhow dhow Xarunta Maamulka, kuwaasoo lagu tuhmay inay ka tirsanayeen kooxihii weerarka soo qaaday oo looga shakisan yahay iney ka tirsanayeen Al-Shabaab.
Xafiiska Shabakada Allbanaadir.com
Muqdisho-Somalia
Allbanaadir@live.com
