Midowga Yurub ayaa maanta maamulka gobolka Banaadir ku wareejiyay gaadiidka Dab damiska iyo sidoo kale ambalaasta, waxaana gaadiidkan loogu tala galay in loogu adeego shacabka magaalada Muqdisho.
Safiirka Midowga Yurub ee Soomaaliya Amb. Garrido Ruiz Fulgencio ayaa gaadiidkan dab damiska iyo amblaasta maanta ku wareejiyay Gudoomiyaha gobolka Banaadir ahna Duqa Muqdisho Cabdiraxmaan Cumar Yariisow.
Amb. Garrido Ruiz Fulgencio ayaa tilmaamay in Midowga yurub ay ka go’an tahay garab istaaga mashaariicda lagu horumarinaayo Caasimadda Soomaaliya ee Muqdisho, waxa uuna sheegay in deeqdan ugu tala galeen in ay ku caawiyaan dowlada hoose ee Xamar.
Gudoomiyaha gobolka Banaadir ahna Duqa Muqdisho Cabdiraxmaan Cumar Yariisow ayaa dhankiisa uga mahad celiyay Midowga Yurub gaadiidkan Dab damiska iyo amblaasyada ee ugu deeqeen, waxa uuna sheegay in shacabka caasimada loou adeegi doono gaadiidkan.
Maamulka gobolka Banaadir ayaa marar badan lagu wareejiyay gaadiidka gurmadka dega dega, ambalaasyo, gaadiidka dhismaha iyo gaadiid kale oo badan, waxaana dhacday in gaadiidkaasi gobolka la siiyay qaarkood in ay galeen gacmo shaqsiyaad gaar ah.
Xafiiska Shabakada Allbanaadir.com
Muqdisho-Somalia
Allbanaadir@live.com
