Sida ay sheegayaan wararka saaka naga soo gaaraya gobolka Sh/hoose waxaa xalay saqdii dhexe ciidamada dowladda Soomaaliya oo ay wehliyaan kuwo cadaan ah ay howlgal qorsheysan ka fuliyeen tuulada Galaawar oo illaa 5km u jirta degmada Afgooye.
Ciidamada sida gaarka ah u tababaran oo ay wehliyaan kuwa cadaanka ah ee la socday ayaa la sheegay iney baaritaano xoogan ka sameeyeen tuulada, iyagoo hurdada ka wada toosiyey dadkii ku noolaa tuuladaas oo ka argagaxay ciidamada faraha badan ee tuulada soo galay.
Dad ku sugan tuuladaas oo diiday in Magacooda iyo codkooda in Warbaahinta loo adeegsado ayaa waxa ay sheegeen in Ciidamadu ay howlgalkaas ku dileen Nin ku sugnaa deegaankaas oo dadka qaarkood ku sheegeen in uu Mu’adin ka ahaa Masjid halkaas ku yaalla ka dib markii uu is hor taagay in ciidamadu ay kaxeystaan wiilkiisa.
Sidoo kale howlgalka ayay ciidamadu ku soo qabteen isla markana ku soo wateen ilaa 7 ruux oo ka tirsanaa dadkii ku noolaa tuuladaas ilaa iyo haddana waxa ay ahaayeen lama oga waxaana dadka degaanku sheegayaan in tuulada aysan gacanta ku heynin Al-shabaab iyo dowlada Somalia toona.
Ciidamada dowlada ayaan ka hadlin howlgalkan ay xalay ka fuliyeen tuulada Galaawar oo saaka si weyn looga hayo tuuladaas iyo tuulooyinka hoos taga degmada Afgooye.
Xafiiska Shabakada Allbanaadir.com
Muqdisho Somalia
Allbanaadir@live.com
