Waxaa maalmihii lasoo dhaafay faraha kasii baxayay amaanka magaalada Muqdisho, waxaana qeybo badan oo magaalada ka dhacayay dilal qorsheesan iyo qaraxyada miinooyinka hareeraha laamiga la dhigo.
Magaalada Muqdisho waxaa shalay kaliya lagu dilay ilaa 8 ruux oo isugu jira askar iyo dad shacab ah, dilka dalkan ayaana loo adeegsaday qarax miino iyo sidoo kale biskoolado si gaadmo ah loogu dilay.
Ciidamada booliiska iyo nabad sugida ayaa qeybo kamid ah magaalada hada ka bilaabay howlgalo balaaran oo amaanka lagu xaqiijinayo, waxa ayna ciidamada baarayaan dadka iyo gaadiidka isticmaalaya koontaroolada qaar.
Xaafadaha magaalada Muqdisho qaarkood ayaa lagu arkayaa ciidamo roondo ku jira kuwaa oo baadi goob ugu jira kooxaha falalka amaan daro inta badan ka fuliya magaalada Muqdisho .
Amaanka magaalada Muqdisho ayaa mudooyinkii lasoo dhaafay ahaa mid aad u wanaagsan, hasa ahaatee isbuucyadii lasoo dhaafay ayaa amaanka u muuqday mid sii xumaanaya ayna kusoo badanayaan dilalka qorsheesan iyo qaraxyada miino.
Xafiiska Shabakada Allbanaadir.com
Muqdisho Somalia
Allbanaadir@live.com
